జగమంత కుటుంబం నాది..ఏకాకి జీవితం నాది .. సంసార సాగరం నాదే .. సన్యాసం శూన్యం నాదే..

Friday, November 13, 2015

దయ్యం ఫార్మ్‌లో ఉంది ('త్రిపుర' మూవీ రివ్యూ)

దయ్యం ఫార్మ్‌లో ఉంది

......................................
తారాగణం: స్వాతి, నవీన్‌చంద్ర, రావు రమేశ్, సప్తగిరి, శ్రీమాన్, 
‘షకలక’ శంకర్; స్క్రీన్‌ప్లే: కోన వెంకట్ - వెలిగొండ శ్రీనివాస్;
 మాటలు:  రాజా; పాటలు: చంద్రబోస్, రామజోగయ్య శాస్త్రి; 
కెమేరా: రవికుమార్ సానా; ఎడిటింగ్: ఉపేంద్ర,  సంగీతం:
 కామ్రాన్; సమర్పణ:  జవ్వాజి రామాంజనేయులు, 
నిర్మాతలు: ఎ. చినబాబు, ఎం. రాజశేఖర్; కథ - దర్శకత్వం: 
రాజకిరణ్; నిడివి: 151 ని॥
.......................................

దయ్యం సినిమాలు ఇప్పుడు స్టయిల్.
అదే ‘ఫార్ము’లా ఇప్పుడు నడుస్తోంది.


గత ఏడాది చిన్న సినిమాల్లో పెద్ద హిట్టయిన కామెడీ హార్రర్ థ్రిల్లర్ ‘గీతాంజలి’.
 ఆ చిత్రంతో దర్శకుడిగా పరిచయమయ్యారు రాజ్‌కిరణ్. ఇప్పుడు ఆయన 
తన రెండో చిత్రంలోనూ ఆ మార్గమే అనుసరించారు. ‘ప్రేమకథా చిత్రమ్’,
 తమిళ డబ్బింగ్ ‘పిజ్జా’ లాంటి సూపర్‌హిట్స్‌తో రెండు మూడేళ్ళ క్రితం 
 పుంజుకున్న ఈ తరహా హార్రర్ కామెడీ ఇప్పుడు బాక్సాఫీస్ వద్ద
 మినిమమ్ గ్యారంటీ ఫార్ములా. కాబట్టి, ‘సేఫ్ బెట్’గా రాజ్‌కిరణ్ 
రాసుకున్న కథ, తీసిన విధానం అర్థం చేసుకోదగినవే.

కథగా చెప్పాలంటే... వరహాపట్నం అనే గ్రామం. అందులో 
శివన్నారాయణ దంపతుల (శివన్నారాయణ, రజిత) పెద్దమ్మాయి
 త్రిపుర అలియాస్ చిట్టి (స్వాతి). మరదలు త్రిపురకూ, ఇంట్లోవాళ్ళకీ 
ఇష్టం లేకపోయినా ఆమెనే పెళ్ళాడాలని తిరిగే మేనమామ
 సన్న్యాసిరాజు (సప్తగిరి). పెళ్ళీడుకొచ్చినా వచ్చిన సంబంధాలన్నీ
 తప్పిపోతున్న త్రిపురకు ఒక చిత్రమైన లక్షణం. ఆ అమ్మాయికి 
ఎవరి గురించైనా, ఏదైనా కలలో వస్తే - అది నిజమవుతుంటుంది. 
ఊరు ఊరంతా ఆ అమ్మాయి నిద్ర లేవగానే - ఆమె కలల్లో తమ
 గురించి, తమ వాళ్ళ గురించి ఏమొచ్చిందో తెలుసుకోవడానికి 
క్యూలు కడుతుంటారు.

కలలపై ట్రీట్‌మెంట్ కోసం త్రిపురను హైదరాబాద్‌లో ప్రొఫెసర్ 
రమేశ్ (రావు రమేశ్) దగ్గరకు తీసుకువెళతారు. అక్కడ డాక్టర్
 నవీన్ (‘అందాల రాక్షసి’ ఫేమ్ నవీన్ చంద్ర) ఆమెకు ట్రీట్‌మెంట్
 చేయడం మొదలుపెడతాడు. అప్పటి దాకా ఎవరిని చూసినా
 పెళ్ళికి వద్దనే హీరోయిన్ తీరా ఒక్క అనుకోని ముద్దుకే సదరు 
డాక్టర్‌ను ఇష్టపడుతుంది. ఆ మరునాడే అతని బెకైక్కి ఊరంతా 
తిరుగుతుంది. అతనూ ఆనందంగా తిప్పుతాడు. పెళ్ళికి ఒప్పుకోని 
తల్లితండ్రుల్ని వదిలేసి, లేచిపోదామని హీరోయిన్ అంటుంది. 
చివరకు డాక్టర్‌తో హీరోయిన్ పెళ్ళవుతుంది.

పెళ్ళయి హైదరాబాద్ వచ్చిన హీరోయిన్‌కు రకరకాల 
అనుభవాలు. ఊరికి దోవ అడిగిన వ్యక్తి మరణిస్తాడు. కలలో 
వచ్చినట్లే బ్రోకర్ తాతారావుకు యాక్సిడెంట్ అవుతుంది. 
ఇంతలో తన భర్తను తానే కత్తితో పొడిచినట్లు కల. అక్కడ ఇంటర్వెల్.  

 మరోపక్క డాక్టర్ నవీన్‌తో చాలా సన్నిహితంగా మెలిగిన కొలీగ్ 
డాక్టర్ ఈషా (పూజా రామచంద్రన్) నెలరోజులుగా కనిపించదు. 
డాక్టర్ నవీన్‌కు ఫ్రెండ్‌‌స గ్రూప్‌లో ఒకడైన సర్కిల్ ఇన్‌స్పెక్టర్ 
తిలక్ (కన్నడ నటుడు తిలక్) దర్యాప్తు చేస్తుంటాడు.  కనిపించకుండా 
పోయిన ఆ అమ్మాయిని చంపిందెవరు? హీరో అమ్మేద్దామనుకుంటున్న
 ఫార్మ్‌హౌస్‌లో ఉన్న దయ్యం కథేమిటి? దయ్యం పగ ఏమిటి?
 ఇంతకీ హంతకుడెవరన్నది మిగతా ఫిల్మ్.

‘కలర్స్’ స్వాతికి ఈ సినిమా వెరైటీనే. తెలుగులో ఎక్కువగా 
ఉత్సాహం ఉరకెలెత్తే పాత్రలు, చిలిపితనం నిండిన పాత్ర 
చిత్రణలతో పాపులరైన ఆమెకిది కొత్త కోణం. పల్లెటూరి 
పిల్లగా మొదలై పెళ్ళయిన అమ్మాయిగా అనుకోని పరిస్థితుల్లో 
ఇరుక్కునే పాత్రలో పెద్ద తరహాగా కనిపించారు. లేడీ
 ఓరియంటెడ్ సినిమా కాబట్టి కథలోని హీరోయిన్ పేరే
 సినిమాకూ పెట్టారు. అందుకు తగ్గట్లే - సినిమాలో అసలు 
గుట్టు విప్పడంలో ఆ పాత్ర నుంచి మరింత యాక్టివ్ రోల్ 
ఆశిస్తాం. పాజిటివ్, నెగిటివ్‌ల మధ్య ఊగిసలాడే పాత్ర 
నవీన్‌చంద్రది. రావు రమేశ్, శివన్నారాయణ, ఇళ్ళ బ్రోకర్ 
తాతారావుగా శ్రీమాన్, పనిమనిషిగా ప్రీతీ నిగమ్ 
తదితరులది పరిధి మేరకు పాత్రపోషణ.

 భయపెట్టడం కన్నా మాస్ మసాలా కమర్షియల్ వినోదం 
మీదే ఆధారపడ్డ ‘త్రిపుర’లో లేటెస్ట్ కామెడీ సంచలనం సప్తగిరి
 మళ్ళీ తన మార్క్ కామెడీతో కనిపిస్తారు. హీరో కావాలనుకొనే 
కోమల్‌బాబుగా ‘షకలక’ శంకర్, అతని తండ్రి రొయ్యల రెడ్డిగా
 జయప్రకాశ్‌రెడ్డి కనిపించేది కాసేపే అయినా సామాన్య ప్రేక్షకుల్ని 
నవ్విస్తారు. చిత్ర నిర్మాణ బృందమంతా ఎక్కువగా కొత్తవాళ్ళూ. 
ఉత్సాహవంతులే. వాళ్ళ కష్టం తెర మీద కనపడుతుంటుంది. 
కొత్త మ్యూజిక్ డెరైక్టర్, కొత్త రైటర్, కన్నడంలో పేరు తెచ్చుకున్న
 కెమేరామన్ - ఇలా ఎక్కువ కొత్త రక్తమే. దాంతో వచ్చే 
ఎడ్వాంటేజ్‌లు, డిజెడ్వాంటేజ్‌లూ తెరపై మనకు స్పష్టంగా కనిపిస్తుంటాయి.

 కలలు నిజం కావడం, ఇన్‌ట్యూషన్‌తో జరగబోయేది ముందుగానే
 ఊహించడం - లాంటి అంశాలతో ఇప్పటికే సవాలక్ష ఇంగ్లీష్ 
సినిమాలొచ్చాయి. కానీ, ఇది మనదైన చిత్రం, చిత్రీకరణ. 
దర్శకుడు రాజ్‌కిరణే కథ రాసుకున్న ఈ చిత్రానికి కోన, వెలిగొండ 
లాంటి పేరున్న రచయితలు స్క్రీన్‌ప్లే ఇచ్చారు. ‘గీతాంజలి’ కథ 
దయ్యం ఉన్న అపార్ట్‌మెంట్ ఫ్లాట్ చుట్టూ తిరిగితే, ‘త్రిపుర’ కథ
 మొత్తం ఫార్మ్‌హౌస్‌లోని దయ్యం చుట్టూ నడుస్తుంది. అక్కడైనా, 
ఇక్కడైనా - మన సగటు సినిమాలన్నిటి లాగానే ఆడ దయ్యమే 
తిరుగుతుంటుంది. ఆ దయ్యం ఏం చేసింది? ఆ పనుల్లో ఎంత 
భయం, మరెంత వినోదం వచ్చాయన్నదే ఇంపార్టెంట్. ఈ కొలతలతోనే 
‘త్రిపుర’ నడుస్తుంది. ఆ క్రమంలో కొన్ని కొరుకుడు పడవు. ఊరవతల
 మర్రిచెట్టు దగ్గర ఒక దయ్యముందని హీరోయిన్ చెబుతుంది. 
తీరా అక్కడ ఆగిపోయిన కారులోని మనిషిని చంపే దయ్యం 
మాత్రం మర్రిచెట్టు దయ్యం కాదు... ఫార్‌‌మహౌస్ దయ్యం.  
అలాగే, ఫస్టాఫ్ అంతా తెగ కలలు కనే హీరోయిన్‌కు సెకండాఫ్‌లో
 కలలు కనే తీరిక ఉండదు. కానీ, ఇలాంటివెన్నో వినోదంలో 
కొట్టుకుపోతాయని ఆశించాలి. ‘‘దీని గురించి ఎక్కువ పట్టించుకోకు. 
కొన్ని విషయాలంతే! లాజిక్‌కు అందవు’’ అని సినిమా చివరలో
 ఒక డైలాగ్ వస్తుంది. కలలు నిజం కావడం లాంటి మిస్టీరియస్
 అంశాలున్న ‘త్రిపుర’కు అంతకు మించి పర్‌ఫెక్ట్ ఎండింగ్ ఇంకేముంటుంది!

.............................................

తెర వెనుక ముచ్చట్లు

- హీరోయిన్ స్వాతి టైటిల్ రోల్ చేయడం ఇదే తొలిసారి. పెళ్ళయిన స్త్రీ పాత్ర
 కోసం ఆరు కిలోల బరువు పెరిగారు.
- ఈ సినిమా చిత్రీకరణకు పట్టిన మొత్తం షూటింగ్ డేస్ 68. 
- {పధాన భాగమంతా హైదరాబాద్ చుట్టుపక్కల తీశారు. సినిమా 
ప్రారంభ గీతంతో పాటు కలర్‌ఫుల్‌గా కనిపించే మరో పాటను 
కర్ణాటకలోని బాదామిలో చిత్రీకరించారు.
- మ్యూజిక్ డెరైక్టర్ అనూప్ దగ్గర కీబోర్డ్ ప్లేయర్ అయిన కామ్రాన్
 సంగీత దర్శకుడిగా పరిచయమయ్యారు.డైలాగ్ రైటర్ రాజాకు 
ఇది తొలియత్నం. కన్నడ హిట్ ‘ఉగ్రమ్’ కెమేరామన్ రవికుమార్ 
‘త్రిపుర’కు పనిచేశారు.  
- షూటింగ్ పూర్తి కాక ముందే ‘గీతాంజలి’ క్రేజ్ వల్ల శాటిలైట్ రైట్స్
 అమ్ముడైపోయాయి. ఇటీవలి కాలంలో ఒక చిన్న చిత్రం రైట్స్ 
రూ. 2.6 కోట్ల దాకా పలకడం విశేషం. 
- తమిళ తెరకు కూడా సుపరిచితులైన స్వాతి, నవీన్ చంద్ర, 
శ్రీమాన్ లాంటి నటీనటులు ఉండడంతో, ఏకకాలంలో తెలుగుతో 
పాటు ‘తిరుపుర సుందరి’ పేరు మీద తమిళ వెర్షన్‌ను కూడా
 తెరకెక్కించారు.
- ‘షకలక’ శంకర్, జయప్రకాశ్‌రెడ్డి ఎపిసోడ్‌ను తమిళ వెర్ష న్‌లో 
అక్కడి నటులతో చేయించారు. తమిళంలో నేరుగా సెన్సార్ చేశారు. 
అక్కడ ఈ నెల 27న రిలీజ్ చేస్తారు.
................................................

 - రెంటాల జయదేవ

(Published in 'Sakshi' daily, 7th Nov 2015, Saturday)
..........................................

0 వ్యాఖ్యలు: