ఒక ‘రోబో’! ఎన్నో కథలు!!

రేపే విడుదల కానున్న రజనీకాంత్ - శంకర్ ల ‘రోబో’ గురించి ఇప్పటికే ఎంతో ఆసక్తి పెరిగింది. ఈ సినిమా గురించి రోజుకో విశేషం, విచిత్రం తెలుస్తూనే ఉన్నాయి.

* మరి కొద్ది గంటల్లో ప్రపంచ వ్యాప్తంగా తమిళ, తెలుగు, హిందీ ప్రేక్షకులను అలరించనున్న ఈ చిత్రం దాదాపు రూ. 150 – 160 కోట్ల నిర్మాణ వ్యయంతో రూపొందింది. ఆ రకంగా అత్యధిక బడ్జెట్ తో తయారైన చిత్రం ఇదేనని రోబో యూనిట్ ఢంకా బజాయిస్తోంది.

* సన్, జెమినీ వగైరా టీవీ చానళ్ళన్నిటికీ మాతృ సంస్థ అయిన సన్ టీవీ నెట్ వర్క్ తమ సినిమా విభాగమైన సన్ పిక్చర్స్ ద్వారా ఇప్పటికే అనేక తమిళ చిత్రాల హక్కులను విడుదలకు ముందు పొందారు. వాటిని విడుదల చేశారు. అయితే, నిర్మాణ దశలోనే ప్రాజెక్టు మొత్తాన్నీ చేపట్టి, తామే స్వయంగా సినిమాను నిర్మించడం సన్ పిక్చర్స్ కు ఇదే మొదలు. సో, వారికి ఇదే మొదటి స్వీయ నిర్మాణ చిత్రమన్నమాట.

* తమిళంలో ఈ యంతిరన్ అలియాస్ రోబోయే మొదటి సైన్స్ ఫిక్షన్ సినిమా.

* కథ సంగతికొస్తే - సమాజానికి ఉపయోగపడే రోబో (మరమనిషి)ని తయారు చేస్తాడు ఓ శాస్త్రవేత్త. పైగా, అచ్చంగా తన పోలికలతోనే, మనిషిలా ప్రవర్తించేలా చూస్తాడు. తీరా ఆ రోబో దేశద్రోహుల చేతిలో పడుతుంది. అప్పుడు ఆ శాస్త్రవేత్త ఏం చేశాడన్నది మిగతా సినిమా.

* రజనీకాంత్ అటు రోబోగా, ఇటు శాస్త్రవేత్తగా ద్విపాత్రాభినయం చేస్తున్నారు. రోబో రజనీకి జంటగా వైద్య పరిశోధక విద్యార్థిగా ఐశ్వర్యారాయ్ నటిస్తున్నారు. ఈ చిత్ర కథలోని అంశాలన్నీ 2020 కాలం చుట్టూ తిరుగుతాయి.

* అయితే, ఇది ఎప్పటి లాంటి రజనీకాంత్ స్టయిల్స్ తో నిండిన సినిమా కాదని యూనిట్ సభ్యులు చెప్పారు. ‘‘మామూలు రజనీకాంత్ సినిమాల లాగా ఇది ఉండదు. రజనీ తరహా స్టయిల్, పంచ్ డైలాగులు ఇందులో ఉండవు. అయితేనేం, రజనీకాంత్ సినిమా కెరీర్ లోనే ఇది అత్యుత్తమ చిత్రం’’ అని రజనీకాంత్ ను రెండు విభిన్న పాత్రల్లో అందంగా చూపిన సినిమాటోగ్రాఫర్ రత్నవేల్ (యూనిట్ అంతా ఈయనను ముద్దుగా ర్యాండీ అని పిలుస్తారు) చెప్పారు.

* మామూలుగా సినిమాలకు వాడే సాంప్రదాయిక లైటింగ్ విధానానికి భిన్నంగా ఈ సినిమా మొత్తంలో కొత్తరకం లైటింగ్ పద్ధతిని వాడారు. పైపెచ్చు, రజనీ 3డి దృశ్యాలను తీయడానికి ఈ సినిమాలో తొలిసారిగా డోమ్స్ లైట్ టెక్నాలజీని ఉపయోగించారు. ఒకే దృశ్యంలో శాస్త్రవేత్తగా, రోబోగా రజనీకాంత్ కనిపిస్తున్నప్పుడు రెండు పాత్రల శరీర ఛాయకూ జత కుదిరేలా లైటింగ్ చేశారట.

‘‘రోబో రజనీకాంత్ దృశ్యాలను విడిగా తీశాం. శాస్త్రవేత్త రజనీ దృశ్యాలను మరోసారి తీశాం. కానీ, రెండూ సరిగ్గా నప్పేలా లైటింగ్ చేశాం’’ అని రత్నవేల్ చెప్పారు. కేవలం లైటింగ్ సరిగ్గా ఉందో లేదో చూసుకోవడానికీ, తీస్తున్న ప్రతి షాట్ లోని సాంకేతిక పరామితులను నోట్ చేసుకోవడానికే రత్నవేలు దగ్గర ఓ ప్రత్యేక అసిస్టెంట్ పనిచేశారు. ఈ మొత్తం సినిమా కెమేరా రిపోర్టే దాదాపు 1600 పేజీలు వచ్చింది.

* ఇక, ఈ సినిమా బడ్జెట్ లో దాదాపు 40 శాతం స్పెషల్ ఎఫెక్ట్ లకే ఖర్చు చేశారు. ఈ సినిమాలో రోబో కోసం వాడాల్సిన యానిమేట్రానిక్స్ టెక్నాలజీ కోసం దర్శకుడు శంకర్ ప్రపంచ ప్రసిద్ధ స్టాన్ విన్ స్టన్ స్టూడియోస్ ను ఆశ్రయించారు. అలాగే, హాంగ్ కాంగ్ కు చెందిన కంప్యూటర్ గ్రాఫిక్స్ నిపుణులను కూడా వినియోగించారు. ఆ స్టాన్ విన్ స్టన్ స్టూడియో వారి యానిమేట్రానిక్స్ టెక్నాలజీని వాడిన తొలి భారతీయ చిత్రం రోబోయే. జురాసిక్ పార్క్, ప్రిడేటర్, టెర్మినేటర్, ఇరన్ మ్యాన్, ఇటీవలి అవతార్ లాంటి పలు చిత్రాలలో అద్భుతమైన పనితనం చూపింది ఈ స్టూడియోయే.

* అలాగే, జాకీ చాన్ కు సైతం దర్శకత్వం వహించి, మ్యాట్రిక్స్, కిల్ బిల్ చిత్రాల సీక్వెల్స్ కు పనిచేసిన యాక్షన్ దృశ్యాల రూపకర్త యూయెన్ వూ పింగ్ ఈ రోబో చిత్రానికి స్టంట్ కో-ఆర్డినేటర్ గా పనిచేశారు.

* అన్నట్లు ఈ సినిమా కోసం రజనీ దాదాపు 55 పైచిలుకు కాస్ట్యూమ్ లలో కనువిందు చేస్తారు. ఐశ్వర్యా రాయ్ కూడా అందుకు తగ్గకుండా 57కు పైగా కాస్ట్యూమ్ లలో కనిపిస్తుంది. మెన్ ఇన్ బ్లాక్ లాంటి హాలీవుడ్ చిత్రాల సిరీస్ కు పనిచేసిన మేరీ ఇ. వోగ్ట్ అనే మహిళ ఈ కాస్ట్యూమ్ విభాగానికి పర్యవేక్షణ జరిపారు. భారతీయ సినిమా పరిశ్రమలో పనిచేయడం ఆమెకూ ఇదే మొదటి సారి.

(మరికొన్ని విశేషాలు తరువాతి టపాలో... మరికొద్ది సేపట్లో... )