జగమంత కుటుంబం నాది..ఏకాకి జీవితం నాది .. సంసార సాగరం నాదే .. సన్యాసం శూన్యం నాదే..

Monday, August 9, 2010

కళ్ళుండీ చూడలేని వారి కోసం మా బెజవాడ ఘనత - 1



‘బెజవాడ పెద్ద పల్లెటూరు’ - అనే సరికి చాలామందికే కోపాలొచ్చాయి. ‘అంత మాట అంటావా’ అంటూ, నేను రాసిన పోస్టు మీద తమ అసహనాన్ని నాతో నేరుగా చెప్పినవారు కొందరైతే, కామెంట్లు రాసినవారు మరికొందరు. ఇంకొందరు అంతటితో ఆగక, ఏకంగా బెజవాడ ఎంత సుందర నగరమో ప్రత్యేకంగా పోస్టులు రాశారు. బెజవాడ మీద నాకేదో ద్వేషం ఉన్నట్లు, నేను ఉద్దేశపూర్వకంగా నిందలు వేసినట్లూ భావించారు. యీ నేపథ్యంలో కామెంట్ల రూపంలో కాక, నా భావాలను మరింత వివరంగా చెప్పాలనే ప్రత్యేకంగా ఈ పోస్టు!

నిజానికి, నన్ను పెంచి, పెద్ద చేసిన బెజవాడ మీద నాకెంత ప్రేమో మొదటి టపాలోనే చెప్పా. ఏ ఊరెళ్ళినా, ఎక్కడున్నా అక్కడికీ, మా బెజవాడలో ఉన్న సుఖానికీ పోలిక చూసుకొని, గర్వంగా భుజాలెగరేయడం నాకూ అలవాటే! అంతమాత్రాన ‘...నా జన్మభూమి ఎంత అందమైన దేశమూ...’ అంటూ కళ్ళు మూసుకొని, ఊహల్లో విహరిస్తూ, వాస్తవ పరిస్థితులను మర్చిపోవడం సబబూ కాదు ! సాధ్యమూ కాదు !! నా బాధల్లా అప్పటికీ, ఇప్పటికీ - బెజవాడలో వచ్చిన అసలు సిసలు అభివృద్ధి - దేశంలోని, రాష్ట్రంలోని అనేక ఇతర నగరాలతో పోలిస్తే - అతి తక్కువేనని!

నేను ట్రాఫిక్ గురించే మాట్లాడుతున్నానని కొందరు మిత్రులు పొరబడ్డారు. కేవలం ట్రాఫిక్ అయితే, బెజవాడ కన్నా హైదరాబాద్ లాంటి ఊళ్ళు మరీ దారుణమని వాపోయారు. నా వాదన ఏమిటంటే - కార్లు, బంగళాల వాళ్ళ మాట అటుంచండి, సగటు మనిషి బతకడానికి సాధారణ వసతులు ఉండాలి కదా! కొన్ని వేల మంది కోసమంటూ ప్రభుత్వమే ఏర్పాటు చేసిన హౌసింగ్ బోర్డ్ కాలనీలో కనీసం రోడ్లు వేయరేం! వారాల కొద్దీ బస్సులే లేకపోతే, ఆ కాలనీలోని దిగువ, మధ్యతరగతి ఆదాయ వర్గ (ఎల్.ఐ.జి, ఎం.ఐ.జి) నివాసులకు రవాణా మాటేమిటి! అక్కడి పిల్లలు చదువులకూ, పెద్దలు ఉద్యోగాలకూ ఎలా వెళ్లాలి? కార్పొరేషనైన ఇన్నేళ్ళ తరువాత కూడా కీలకమైన కూడళ్ళలో కూడా సరైన రోడ్లకు నోచుకోని బస్తీని ఏమనాలి? నగరం అనాలా, పల్లెటూరు అనాలా?

నగరమంటే ఓ ముందు చూపు, ఓ నిర్దిష్ట ప్రణాళికతో నిర్మాణం, విస్తరణ పనులు, అభివృద్ధి కార్యక్రమాలు చేపట్టాలి. అప్పుడే పెరిగే జనాభా అవసరాలను ఆ నగరం తీర్చగలుగుతుంది. కానీ, ప్రధాన కూడలి అయిన బస్ స్టాండ్ లాంటి చోట్ల కూడా నగర అవసరాలను గుర్తించని / తీర్చని రీతిలో ఫ్లయ్ ఓవర్ వేసి, ట్రాఫిక్ సిగ్నల్ పెట్టేస్తే సరిపోతుందా! మామూలు రోజుల్లోనే బెజవాడ బస్టాండ్ ఎదుట అంతంత సేపు బస్సులు ఆగిపోతూ, పావు ఫర్లాంగైనా లేని దూరానికి పది నిమిషాల పాటు హారన్ల మోత, జనం కూతల మధ్య కదలని బస్సుల్లో ఖైదీలుగా కూర్చోవాల్సి వస్తోంది.

ఇక అమ్మవారి పండుగలైన దసరా లాంటి రోజుల్లో పరిస్థితి ఏమిటో ఊహించుకోవచ్చు. ఇది ఎంత నరకమో రోజూ ఆ దోవలో చదువులకూ, ఉద్యోగాలకూ, అత్యవసరమైన పనులకూ వెళుతున్న మామూలు వాళ్ళతో మాట్లాడి చూస్తే తెలుస్తుంది. ‘ఏలూరు రోడ్డు బాగుంది’, ‘బందరు రోడ్డుకేం బ్రహ్మాండంగా ఉంది’... అనుకుంటే చాలదు. ఏడాది క్రితం వర్షాలకు వన్టౌన్ మొత్తం మునిగిపోయిన సంఘటన అప్పుడే మర్చిపోదామా! మరోసారి వర్షాల్లో మునిగితేనో, టూ టౌన్ దాకా ఆ ప్రమాదం వస్తేనో - అప్పుడు కళ్ళు తెరుద్దామా!!

భారీ వర్షాలు వస్తే బుడమేరు పొంగి, కాలనీలు మునిగిపోవడం ఎన్నిదశాబ్దాలుగా మనం చూస్తున్న తతంగం. దానికి శాశ్వత పరిష్కారం కనుక్కోవడానికి మన వాళ్ళకు చిత్తశుద్ధి లేదేం! ఆ కాలనీల్లో ఉండేవాళ్ళు మనుషులు కారా!

(మిగతా భాగం మరి కాసేపట్లో....)

6 వ్యాఖ్యలు:

Anonymous said...
This comment has been removed by the author.
Anonymous said...

మాది నెల్లూరు. సం|| లో ఒక పది రోజులు గడపడానికి పోతె అదెంత చెత్త ఊరో అని అర్థమౌతుంది. ఆటొల సంఖ్య విపరీతంగా పెరిగింది. కార్పోరేషన్ చేసి ఎక్కువ గా టాక్స్ కట్టించు కోవటం తప్పించి, అభివృద్ది మీద అసలికి దృష్టి పెట్టని గత 7 సం|| ఎదైనా ఊరు ఉందంటె అది మా ఊరే. దీనికి తోడు జన్మ భూమి పేరుతో వేసిన సిమెంట్ రోడ్లన్ని గుంతలు పడి స్కూటర్ లో పోతుంటె ఎగిరి కింద పడతామేమో అని అనుమానం వస్తుంది. ఒక్కొక్క డాలర్ లెక్క వేసుకొని కష్టపడి దాచి పెట్టి, అమేరికా నుంచి ఇక్కడ వచ్చి సేటిల్ అయ్యేవారిలా స్థలాలు కొనే వారి వలన రియల్ ఎస్టేట్ భూం తో ఊరు కదలని., పాతుకు పోయిన వారందరు కోట్లు సంపాదించారు. వారిది బావిలో కప్ప లాంటి జీవితం దానికి తగ్గట్టు ఆస్తులు కోట్ల కి పెరిగి యన్.ఆర్.ఐ. ల కన్నా ఎక్కువ గా సంపాదించారు. వారు కనీసం మంచి రోడ్లు మన ఊరికి లేవెమి అని కూడా అనుకోరు. అలా సర్దుకొని పోతూ ప్రజలకు పైస సేవ చేయని ఒక కుటుంబాన్ని పదే పదే గెలిపించటానికి అవసరమయ్యె డబ్బులు సరఫరా చేస్తుంటారు. తెలుగు వారిలో డబ్బులు సంపాదించిన వారికి కనీసం కొంచెం క్వాలిటి జీవితం గడపాలని ఆశకూడా లేదు. ఎప్పుడు చూసిన ఆవర్గం గెలుస్తుందా ఈ వర్గం గెలుస్తుందా అని ఒకటె రాజకీయ విశ్లేషణలు చేయటాని కొరకు రాజకీయ పార్టిలు, ఎన్నికలు ఉన్నాయని నెల్లూరు/తెలుగు వారి ప్రగాఢ నమ్మకం. అంతే కాని ఎవరైనా కొంచెం అభివృద్ది చేసే వాడికి ఓటు వేద్దాం అన్న ఆలోచనని కలలో కూడా రానీరు.

Anonymous said...

CORRUPTION -- NOT ONLY IN GOVT OFFICES OR IN POLITICS, "SUCH" PEOPLE ARE THERE EVEN IN YOUR JOURNALISM FIELD. YOU SHOULD NOT FORGET IT. HOW MANY DAYS YOU WISH TO CONTINUE THIS VIJAYAWADA EPISODE PLEASE ? DONT YOU HAVE ANY OTHER TOPICS LIKE RBI VAN CARRYING HUGE MONEY OR KASHMIR FLASH FLOODS OR PANTHER ON TIRUMALA GHAT/SHIPS COLLIDED TO WRITE ?

Anonymous said...

there was no "Kareem Hotel" news in your article on Vijayawada.

వీరుభొట్ల వెంకట గణేష్ said...

Wow, Nostalgia. Some body mentioned Kareem Hotel. Nice.

Unknown said...

@ శ్రీనివాల్ గారూ, నెల్లూరు అప్డేట్లు బాగున్నాయి. ఊరిని సన్నిహితంగా గమనిస్తున్న మీరు అక్కడి పరిణామాలు, ఊహించని రీతిలో డబ్బులొచ్చిపడ్డ బావిలో కప్పల గురించి చక్కగా చెప్పారు. ఇలాంటి పరిణామాలు గడచిన దశాబ్ది పైచిలుకుగా ప్రతి ఊళ్ళో పెరిగిపోతున్నవే. సమస్యలపై పోరాటం విషయంలో, ఎన్నికల విషయంలో మనందరి జడత్వం మారి తీరాల్సినవి.

@ ఎనానిమస్ గారూ, అవినీతి ఫలానా రంగంలోనే ఉంది. ఫలానా రంగంలో లేదని ఎవరూ అనడం లేదు. దాని గురించి తోలు మందం గాళ్ళగా మారకుండా, మన చైతన్యాన్ని పెంచుకోవడం, నలుగురితో పంచుకోవడం ముఖ్యం. కాదంటారా. ఇక, మీరన్నట్లు అనేకానేక అంశాల మీద బ్లాగు లో రాయవచ్చు. దానికి రాసేవాడి మీద ఉన్న అవగాహన, ఆసక్తి, రోజు వారీ ఉద్యోగాల పరుగులో కేటాయించగల సమయం అన్నీ కీలకం. ఇక, కరీమ్ హోటల్ కబుర్లు నా శీర్షిక పేరు. బెజవాడ గాంధీనగరంలోని కరీమ్ హోటల్ సెంటర్, న్యూ ఇండియా హోటల్ సెంటర్ ఎంత ప్రసిద్ధమో, ఊళ్ళో రచ్చబండలా జనం అక్కడ కలుసుకొని, టీ తాగుతూ సినిమాల నుంచి రాజకీయాల దాకా అక్కడ చెప్పుకొనే కబుర్లు, చేసే కామెంట్లు, అక్కడ జరిగే డీలింగులు బెజవాడ వాస్తవ్యులకు, ముఖ్యంగా నిన్నటి తరానికి సుపరిచితం. అందుకే, నా శీర్షికకు ఆ పేరు పెట్టా. అంతేతప్ప, ప్రతి పోస్టులో కరీమ్ హోటల్ ప్రస్తావన కోసం అందులో వెతకకండి. తెలియనివారి సౌలభ్యం కోసం వీలు వెంట, కరీమ్ హోటల్ గురించి మరోసారి వివరంగా....