ఆర్భాటంగా సాగిన సౌందర్య పెళ్ళి

(మొదటి ఫోటోలో - సాంప్రదాయిక వివాహ దుస్తుల్లో రజనీ కాంత్ చిన్న కూతురు సౌందర్య, పెళ్ళి కొడుకు అశ్విన్ రామ్ కుమార్;
రెండో ఫోటోలో - కూతురు అల్లుడుతో రజనీ కాంత్)
...........................

పెద్దింటి పెళ్ళిళ్ళు ఎలా ఉంటాయో చెప్పడానికి సినీ నటుడు రజనీకాంత్ ఇంట జరిగిన వివాహం తాజా ఉదాహరణ. రజనీకాంత్ చిన్న కుమార్తె సౌందర్య వివాహం ఇవాళ సెప్టెంబర్ 3 శుక్రవారం నాడు మద్రాసులో జరిగింది. రజనీకాంత్ అంతటి వాడు స్వయానా వచ్చి, ఫోన్ చేసి పెళ్ళికి పిలిస్తే రాని వాళ్ళు ఎవరుంటారు. అందుకే, ఎగ్మూరులో పెళ్ళి జరిగిన రాణీ మెయ్యమ్మై కల్యాణ మండపం మొత్తం అతిథులతో నిండిపోయింది. సినీ, రాజకీయ రంగ ప్రముఖులతో కళకళ లాడింది. స్టాన్ ఫోర్డ్ లో చదువుకున్న యువ తమిళ వ్యాపారవేత్త అశ్విన్ రామ్ కుమార్ తో రజనీకాంత్ చిన్న కూతురు సౌందర్య వివాహం సాంప్రదాయిక తమిళ బ్రాహ్మణ పద్ధతిలో జరిగింది.

చిత్ర నిర్మాత - ఓఖర్ స్టూడియో మేనేజింగ్ డైరెక్టరైన సౌందర్య ఇప్పటికే తన తండ్రి రజనీకాంత్ ను ప్రధాన పాత్రగా చేసుకొని సుల్తాన్ - ది వారియర్ పేరిట ఓ యానిమేషన్ చిత్రాన్ని నిర్మిస్తోంది. ఆ సినిమా దాదాపు చివరి దశకు వచ్చిన తరుణంలో ఇప్పుడు సౌందర్యకు పెళ్ళయింది. సౌందర్య పెళ్ళికి నటుడు కమలహాసన్, దర్శకులు బాలచందర్, మణిరత్నం, సుహాసిని, కేంద్ర హోమ్ మంత్రి చిదంబరం, తమిళనాడు ముఖ్యమంత్రి కరుణానిధి తదితరులు హాజరయ్యారు. మన తెలుగు మెగాస్టార్ చిరంజీవి, హీరో వెంకటేష్, రాధిక, తెలుగు దేశం పార్టీ అధ్యక్షుడు చంద్రబాబు నాయుడు కూడా పెళ్ళికి హాజరైనవారిలో ఉన్నారు.

పెళ్ళికూతురు సౌందర్య ఆకుపచ్చ, ఎరుపు రంగుల తొమ్మిది గజాల పట్టుచీరల్లో మెరిసిపోయారు. ఆమె ధరించిన ఆభరణాలు సాంప్రదాయికంగా, వివాహ సందర్భానికి తగ్గట్లు ఉన్నాయి. పెళ్ళి భోజనం కూడా సంప్రదాయ సిద్ధంగా అరటి ఆకుల్లో బంతి భోజనాల పద్ధతిలో సాగింది. బిస్బేళీ బాత్, మైసూరు రసం లాంటి కర్నాటక తరహా వంటకాలతో సహా మొత్తం 26 వంటకాలతో భోజనం వడ్డించారు. గురు, శుక్రవారాలు రెండు రోజులూ సౌందర్య పెళ్ళి రిసెప్షన్, పెళ్ళితో రజనీకాంత్ ఇంటిలోనే కాక తమిళ మీడియాలోనూ సందడే సందడి. ఆకాశమంత పందిరి, భూదేవంత అరుగుగా సాగిన సౌందర్య పెళ్ళి కొద్దికాలం పాటు తమిళనాట గుర్తుండిపోయే ఘటనే. సౌందర్య వైవాహిక జీవితం సుఖ సంతోషాలతో సాగాలని కోరుకుందాం.

పి.ఎస్. - విశేషం ఏమిటంటే, ఇంత హడావిడి సాగుతున్నా రజనీ కాంత్ మాత్రం చెరగని చిరునవ్వుతో, వచ్చిన ప్రతి ఒక్క అతిథినీ సాదరంగా స్వాగతించడం. పేరు పేరునా పలకరించడం. పెళ్ళి సమయంలో సాగే పూజ, కన్యాదాన మంత్రాల సమయంలో కూడా రజనీకాంత్ చాలా శ్రద్ధగా, భక్తిగా, సగటు ఆడపిల్ల తండ్రిలా వ్యవహరించడం చూసిన ఎవరికైనా ముచ్చట కలిగిస్తుంది. ఎంత పెద్దింటి వివాహమైనా, సెంటిమెంట్లు మాత్రం అందరికీ ఒకటే కదూ!