జగమంత కుటుంబం నాది..ఏకాకి జీవితం నాది .. సంసార సాగరం నాదే .. సన్యాసం శూన్యం నాదే..

Friday, August 6, 2010

బెజవాడ... ఓ పెద్ద పల్లెటూరు!

కొన్ని నెలల తరువాత మళ్ళీ మా ఊరు బెజవాడ... అదే విజయవాడ వెళ్ళా. ఎంతైనా పుట్టి పెరిగిన ఊరు కదా... ఎవరికైనా ఆపేక్ష ఎక్కువుండడం సహజం. నా మటుకు నాకూ అంతే. ఎప్పుడు వెళ్ళినా ఒకటి రెండు రోజుల సెలవులో ఏదో హడావిడిగా పని చూసుకొని,మళ్ళీ ఉద్యోగానికి వచ్చేయడమే. ఈసారీ అంతే. కాకపోతే, బయట కొద్దిగా ఎక్కువ తిరగాల్సి రావడం, దానికి తోడు వర్షాకాలం కావడంతో, ఊరి అసలు పరిస్థితులు కాస్త ఎక్కువగానే తెలిసొచ్చాయి.
అందుకనో ఏమో నాకీ సారి బెజవాడ అంతగా నచ్చలేదు. ఊహ తెలిసినప్పటి నుంచీ చూస్తున్న ఊరు... నన్ను పెంచి
పెద్ద చేసిన ఊరు... మార్పులు చాలానే వచ్చాయి. కానీ, అవన్నీ మంచికా, చెడుకా... అంటే ఏక పద, ఏక వాక్య సమాధానాలు చెప్పలేం. మార్పు సహజం అనుకొని మనల్ని మనం ఊరడించుకోవచ్చు. కానీ, మారని
విషయాల మీద అసహనాన్ని మాత్రం ఎలా శాంతింపజేసుకోవాలి.

నాకు జన్మనిచ్చిన ఊరు, నాకు చదువు చెప్పిన ఊరు ఇప్పుడు అప్పటి బెజవాడ కాదు. కనీసం నిన్న మొన్నటి విజయవాడా కాదు. జనం పెరిగారు. వాహనాలు పెరిగాయి. రద్దీ పెరిగింది. మునుపటి కన్నా విలాసాలు
పెరిగాయి. కానీ, ఇప్పటికీ ఊళ్ళో ప్రాథమిక సౌకర్యాలు పెరిగినట్లు కనిపించలేదు. కాస్తంత వర్షానికే కాలనీల నిండా బురద. మనుషులు కాదు కదా, కనీసం పశువులు కూడా తిరగడానికి భయపడేంత బురద... బస్సులు
లోపలికి రావడం బంద్. కనకదుర్గ గుడి కొండ వెనుక వైపున ఉండే భవానీపురం, ఆ చుట్టుపక్కలి హౌసింగ్ బోర్డ్ కాలనీ లాంటి వాటిల్లో జనం పడే బాధ వర్ణనాతీతం. హైదరాబాదుకు దారి తీసే 9వ నంబరు జాతీయ రహదారి
(ఎన్.హెచ్. 9)కు కూతవేటు దూరంలో ఉన్న కాలనీల పరిస్థితులు ఇంత దారుణంగా ఉన్నాయంటే ఎవరైనా నమ్మగలరా...

ఇక, కృష్ణలో స్నానం చేసి, కనకదుర్గమ్మ వారిని దర్శించుకోవడానికి రోజూ కొన్ని వేల మంది వస్తుంటారు. కానీ, అదేం
పాపమో... దుర్గా ఘాట్ దగ్గర కనీసం రోడ్డు కూడా సరిగ్గా లేదు. ఎన్.హెచ్. 9 మీదుగా హైదరాబాద్ వైపు నుంచి ఊళ్ళోకి వచ్చే వాహనాలు, అవి కాక సిటీ బస్సులు, ఆటోలు, బండ్లు... అన్నిటికీ ఆ రోడ్డే గతి. కొండ వెనక పక్క
నుంచి కొండ ముందుకు దూరం కిలోమీటరైనా ఉంటుందో, ఉండదో... కానీ, ఆ కాస్త దూరం ప్రయాణానికి అరగంట పైనే పడుతోంది. అంటే, అక్కడ మన వాళ్ళ ట్రాఫిక్ నిర్వహణ ఎలా ఉందో అర్థం చేసుకోండి. బస్సెక్కితే నరకమే...

బెజవాడలో స్థానిక సిటీ బస్సులన్నీ బస్టాండ్ మీదుగానే వెళతాయి. గమ్యం ఏదైనా సరే, మార్గమధ్యంలో బస్ స్టాండులోకి వెళ్ళి, ఆ తరువాతే గమ్యం దిశగా ప్రయాణం. బస్టాండ్ ముందే పోలీసు కంట్రోల్ రూం, ఓ
ఫ్లయ్ ఓవర్. అక్కడ నాలుగు పక్కలకూ దోవలు. వన్టౌన్ మీద నుంచి టూ టౌన్ లోకి బస్ లో రావాలన్నా, ఏలూరు రోడ్డు - బందరు రోడ్డుల్లోకి వెళ్ళాలన్నా అదే కీలకమైన కూడలి. కొన్నేళ్ళ క్రితం అక్కడ ఓ ఫ్లయ్ ఓవర్ వేశారు - వన్టౌన్
నూ, టూ టౌన్ ను కలపడానికి. కానీ, భవిష్యత్ అవసరాలను పట్టించుకోకుండా ఈ రోజు గడిస్తే చాలు అన్న పద్ధతిలో కట్టిన ఆ ఫ్లయ్ ఓవర్ తో ట్రాఫిక్ ఇబ్బందులు మరింత పెరిగాయి. బస్ స్టాండ్లోకి బస్ వెళ్ళి, బయటకు
రావడానికి కనీసం 10 నుంచి 15 నిమిషాలు పడుతోంది. ట్రాఫిక్ సిగ్నల్ దగ్గర వరుసగా ఆగిపోయిన బస్సులు.

వన్టౌన్ గా పేరున్న పాత బస్తీ ప్రాంతంలో ఇవాళ్టికీ పూర్తి అండర్
గ్రౌండ్ డ్రైనేజీ వసతి లేదు. గట్టి వాన పడితే, ఆ ప్రాంతమంతా జలమయం.
ఇదుగో అదుగో అంటున్న పాలకులు గత రెండు, మూడేళ్ళుగా మురుగు నీటి
పారుదల వసతి కంటూ రోడ్లు తవ్వుతూనే ఉన్నారు. మట్టి పోస్తూనే ఉన్నారు.
నిధులు ఖర్చవుతున్నాయి కానీ, పనులు జరిగిన దాఖలాలు లేవు. రోడ్లన్నీ
అలాగే తవ్వి పడేసి ఉన్నాయి. వానలో కాదు కదా, మామూలుగానైనా సరే
నడవాలంటే భయపడే పరిస్థితి.

అందుకే, వాణిజ్య రాజధాని, సినీ రాజధాని, కోస్తాకు గుండె
కాయ - ఇలా బోలెడు పేర్లయితే ఉన్నాయి కానీ, విజయవాడ నిజంగా ఏ
మేరకు అభివృద్థి చెందిందంటే అనుమానమే. సరైన రోడ్లు, పారిశుద్ధ్యం,
మురుగునీటి పారుదల వసతి లేని ప్రాంతం మహానగరం ఎలా అవుతుంది..
రాబోయే రాష్ట్రానికి కాబోయే రాజధాని (ప్రత్యేక ఆంధ్ర ఇవ్వాలంటున్న వారి వాదన)
ఎలా అవుతుది...

ఈ సెప్టెంబర్ నాటికి కార్పొరేషన్ కాలం ముగుస్తుందట.
అందుకని ఇప్పుడు ఏదో పని అయిందంటే అయిందనిపించాలని పాలకులు
హడావిడి పడుతున్నారు. వీలుంటే అయిదారు నెలల పైగా ఎన్నికలు వాయిదా
వేయించాలని చూస్తున్నట్లు జనం చెప్పుకుంటున్నారు. అంటే, ఎన్నికలంటే
భయం తప్ప, జనానికి ఏదైనా చేయాలని ఎవరికీ లేదన్నమాట.

కావాలంటే మీరిప్పుడు బెజవాడ వెళ్ళి చూడండి. అది రాష్ట్రంలోని
పేరున్న పెద్ద నగరమంటే మీరే కాదు, ఆ ఊరికి కొత్తగా వచ్చినవాళ్ళూ నమ్మరు.
అభివృద్ధి అంటే, ఏ బందర్ రోడ్డులోనో కనిపించే బంగళాలు, షాపింగ్ మాల్స్
కాదు... మన చుట్టూ వెలిసిన ఐ నాక్స్ థియేటర్లూ కాదు... ఏరి కోరి వెళ్ళే
ఏసి వస్త్ర దుకాణశాలలూ కాదు... సామాన్యుడి జీవితంలో ప్రమాణాలు
పెరగనప్పుడు అది ఏ రకం అభివృద్ధి.

అందుకే, మళ్ళీ మళ్ళీ అంటున్నా - మా
బెజవాడ ఇప్పుడు సిటీ కాదు, పే...ద్ద పేరున్న పల్లెటూరు.... బెజవాడ
బాగుపడాలంటే... కనీసం బాగున్నట్లన్నా కనిపించాలంటే... అక్కడ
ఎన్నికలు రావాలి. అదీ ప్రతి రోజూ రావాలి... అప్పటి దాకా నా కిష్టమైన నా
ఊరు ఓ పల్లెటూరే...

23 వ్యాఖ్యలు:

aswin budaraju said...
This comment has been removed by the author.
ఆ.సౌమ్య said...

ఇదేమిటండీ...మా విజయనగరాన్నే ఇన్నాళ్ళు పెద్ద పల్లెటూరు అంటారనుకున్నాను...ఇప్పుడు బెజవాడ కూడానా?

నవీన్ శాఖమూరి said...

మీ పోస్టు చదవగానే నాకు కూడా ఒకసారి విజయవాడ వెళ్ళాలనిపించిందంది. నెను పుట్టిందీ పెరిగిందీ చదివిందీ అన్నీ అక్కడే.
మన విజయవాడలొ ఈ పరిస్ధితికి మున్సిపాలిటి అసమర్ధత కారనమండీ. అప్పటికి మీరు ఉన్నారో లెదో, బందరోడ్డు అభివ్రుద్ది అని మధ్యలో ఒక డివైడర్ కట్టరు. వెంటనే రోడ్ వైడనింగ్ అని ఈ డివైడర్ సరిగ్గా లేదని మొత్తం మళ్ళి పడగొట్టారు. అక్కడే తెలుస్తోంది మన మున్సిపాలిటి యంత ఛక్కగా పనిచెస్తొందో.

రాజేంద్ర కుమార్ దేవరపల్లి said...

విజయవాడ అన్న పేరు బదులు యే ఊరు పేరు పెట్టినా అంతే ఉన్నాయండి.మీరే అలాగనుకుంటే ఇక ఏలూరు వాళ్ళేమనుకోవాలి ??

rentala jayadeva said...

@ అశ్విన్ బూదరాజు గారూ,
@ రాజేంద్ర కుమార్ దేవరపల్లి గారూ,

నమస్తే. నా ఉద్దేశం ఇక్కడ విజయవాడ ఒక్క్టటే అలా ఉందని కాదు. మన దేశంలో నూటికి 99 శాతం ఊళ్ళ పరిస్థితి ఇదే. మీరన్నట్లు హైదరాబాద్, ఏలూరుల్లోనూ ఇలాంటి పరిస్థితులే ఉండి ఉండవచ్చు (నేను ఇటీవల ఆ రెండు ఊళ్ళూ వెళ్ళలేదు కాబట్టి నేను వాటిపై చెప్పలేను). కానీ, విజయవాడ పేరు గొప్పగా, ఊరు దిబ్బగా మారుతున్న సంగతినీ, కనీస వసతుల గురించి కూడా పట్టించుకోని మన పాలకుల నైచ్యాన్నీ నలుగురితోనూ పంచుకోవడమే నా పోస్టు వెనక ఉన్న ఆలోచన. కొందరిలోనైనా అది ఆలోచన రేపితే, ఏ ఒక్కరినైనా ఆచరణకు పురిగొల్పితే సంతోషించాలని ఆశ.

@ నవీన్ శాఖమూరి గారూ,

నమస్తే. విజయవాడలో మీరు చెప్పిన పరిణామాలలో కొన్నింటికి నేనూ ప్రత్యక్ష సాక్షినే. కార్పొరేషన్ అధికారుల అసమర్థత, అలసత్వం సరే. ఘనత వహించిన కార్పొరేటర్ల దగ్గర నుంచి ఎమ్మెల్యేలు, ఎంపీలు ఏం చేస్తున్నట్లు. నియోజక వర్గ అభివృద్ధి నిధుల నుంచి కనీసం రోడ్లయినా వేయించలేరా. వోటు కోసం తిరిగినప్పటి శ్రద్ధ ఇప్పుడు ఉండదేం. మన వోటర్లు నిలదీయరేం. మన పత్రికలు, టీవీలు వీటి గురించి గట్టిగా మాట్లాడవేం.

nagarjuna said...

జయదేవగారు నెను అశ్విన్ వ్యాఖ్యను చూసాను..మీరు అనుకున్న ఉద్దేశ్యంళొ అయితే మా హైదారబాదుకూడా పల్లెటూరే మరి

కొత్త పాళీ said...

ఇంటరెస్టింగ్.
దీనికి ఇంకో పార్శ్వాన్ని చూశాను విజయవాళ్ళో ఈ మధ్యన నెల్రోజులు గడిపినప్పుడు.

మీరు అభివృద్ధే అన్న్న ఆ బందర్రోడ్డు బెంజి సెంటరు భవన రాజాలు కూడా ఏదో అక్కడోటీ అక్కడోటీ మెరుస్తున్నాయి తప్ప, నగరమ్మొత్తంగా చూసుకుంటే, ఒక ప్రణాళిక గానీ, ఒక అభివృధ్ధి దృష్టిగానీ కనబడదు. 30-40 ఏళ్ళ కిందటి ఆర్ధిక కేంద్రబిందువులు బెసెంటు రోడ్డు, అలంకార్ సెంటరు, ఇత్యాదులు మట్టిగొట్టుకు పోతున్నాయి. వంటవునైతే అసలు చెప్పనక్కర్లేదు, ఎంత దరిద్రంగ ఉండేది.
40 ఏళ్ళ కిందట, ఇప్పుడున్న మాల్సూ, మెరుపులూ లేకపోవచ్చును గానీ నగరపు పెద్ద వీధుల్లో నడుస్తుంటే మనం ఒక నగరంలో ఉన్నాం అన్నట్టుగా ఉండేది.
ఇప్పుడు విజయవాడ ఆ రూపాన్నీ గుణాన్నీ పూర్తిగా కోల్పోయింది.

శరత్ 'కాలమ్' said...

విజయవాడలో కొన్నేళ్ళు గడిపాను. ఇది నాకు ఇష్టమయిన నగరం. దాదాపు పదిహేనేళ్ళయ్యింది మళ్ళీ వెళ్ళక. ఈ సారి ఇండియా వెళ్ళినప్పుడు సిటీకి వెళ్ళి ఎలా వుందో చూడాలనుకుంటున్నాను.

చిన్ని said...

andamayina nagaram vijayavada .
andham kooda chuse kalla batti vuntundhilendi

critic said...

బెజవాడ గురించి మీరు రాసింది కరెక్టే గానీ, హైదరాబాద్ ట్రాఫిక్కష్టాలను భరించీ భరించీ అక్కడికి వెళ్తే.. ఎంతో రిలీఫ్ గా అనిపిస్తుంది. పెద్దగా ట్రాఫిక్ బెడద ఉండని ఏలూరు రోడ్లో ఎంతదూరమైనా నడిచివెళ్ళాలనిపిస్తుంది.

అన్నట్లు..జయదేవ్ గారూ! మీ బ్లాగు పేరు ‘ఇష్టపది’ మీ పేరును స్ఫురింపజేస్తూ చాలా బావుంది.

జ్యోతి said...

జయదేవ్,,

ఈ దారుణమైన పరిస్థితులు చూసి మీకు కడుపు రగిలిపోయింది. అదంతా మీ మాటల్లొ కనిపిస్తుంది. ప్రభుత్వాన్ని, వివిధ శాఖలను నిందించారు.గుడ్.. కొద్ది రోజుల తర్వాత మీ ఉద్యోగంలో పడి మరచిపోతారు. మళ్లీ ఎప్పుడో వెళితే అదే సీను కనిపిస్తుంది. వాళ్లను అన్నారు మరి మీరేం చేసారు. మీరైనా, వేరే ఎవరైన బెజవాడ వాస్తవ్యులు ఒక్కసారైనా ఈ సమస్యలు, కారణాలు చూపిస్తున్నారు కాని పరిష్కారం వెతికారా? ఎప్పుడైనా వెళ్లి సదరు అధికారి, నాయకుడిని కాలర్ పట్టుకుని అడిగారా? వినలేదు అంటారా? ఐతే ఊరుకుని మా ఖర్మ ఇంతే అని వచ్చేసి మీ దైనందిన జీవితంలో మునిగిపోయారు. మన సంస్థలో డబ్బులిచ్చి పని చేయించుకుంటాం. సరిగ్గా పని చేయకుంటే వాడిని పిలిచి తిడతాం, ఐనా వినకుంటే గెంటేస్తాం. మరో మంచి వ్యక్తిని చూసి నియమిస్తాం. కాని ఈ నాయకుల విషయంలో అలా చేస్తున్నారా? ఓటు హక్కు వినియోగించుకోవాలి అని మంచివాడని నమ్మి గెలిపిస్తున్నారు. ఐదేళ్లకోసారి వచ్చే వ్యక్తి గురించి ఏం తెలుసని , ఏ నమ్మకంతో గెలిపిస్తున్నారు. ఏరు దాటేవరకు ఓడ మల్లయ్య , ఏరు దాటాక బోడి మల్లయ్య అన్నట్టు వాళ్లు ప్రజలను వాడుకుంటున్నారు. ఇది ఎంతమంది బుర్రలోకి ఎక్కింది. ఏదో చేస్తాడని ఆశ. మళ్లీ ఎన్నికలప్పుడు కూడ ఆశ. అలా ఆశలతోనే బ్రతకాలనుకున్నప్పుడు ఇలాంటి సమస్యల గురించి అడగొద్దు.... లేదా మనమే ఎన్నుకుని , పన్నుల రూపంలో అందరికీ జీతాలిస్తున్నాం. పని చేయకుంటే అడగాలి అని అనుకుంటే మంచిది... లేకుంటే అందరూ కలిసి తమ కాలనీ వరకైనా బాగు చేసుకోవాలి. ఇలా ఎవరూ చేయరు. కష్టాలకు అలవాటుపడిపోయారు. డిపార్టుమెంట్ వాడు చేస్తాడు.మునిసిపల్ వాడి పని అని వదిలేస్తారు. ఎవరింటి ముందు వాడు శుభ్రంగా పెట్టుకుంటే వీధి మొత్తం శుభ్రంగా ఉంటుంది. ఆ కామన్ సెన్స్ మాత్రం ఎవరికీ ఉండదు. డబ్బులిచ్చి పనులు చేయించుకుంటూ లంచాలు, అవినీతి అంటారు. ఇచ్చేవాళ్లుంటేనే కదా తీసుకునేవాళ్లు ఉండేది. అలా అడిగినవాడిని తన్నండి. ఏమంటాడో. అలా జనం తిరగబడితే కాని పనులు కదలవు. అలా చేయరే ఎవ్వరు. ఇలా అడిగితే నన్ను ఎగాదిగా చూస్తారు జనాలు.


మాటలు కాదు చేతలు అవసరం.

నవీన్ శాఖమూరి said...

@జయదేవ్ గారు
మీరు చెప్పింది నిజమే. నేను కార్పొరేషన్ని, కార్పొరేటర్లని, ఎమ్మెల్యేలని, ఎంపీలని అందరినీ ఉద్దేసించి రాసాను. కాకపోతే అందరి పేర్లు రాయటానికి బద్దకమేసి కార్పొరేషన్ని మాత్రమే ప్రస్థావించను.

కొత్త పాళీ said...

ఈ లెక్కన, విశాఖపట్నం నాకు చాలా నచ్చింది. ఇటువంటి సమస్యలు అక్కడా ఉన్నాయి. కానీ వోలు మొత్తమ్మీద తనకంటూ ఒక నాగరిక వ్యక్తిత్వాన్ని కొత్తగా రూపొందించుకున్నది ఆ నగరం.

Anonymous said...

అంత పెద్ద మహానగరం బెజవాడనే మీరు పల్లెటూరంటున్నారు. దాని పక్కనే ఉన్న, ఎవఱూ పట్టించుకోని జంటనగరం (జంటపల్లె ?) మా గుంటూరు. మేమెవరితో మొర పెట్టుకోవాలి ? బెజవాడ-గుంటూరు ప్రాంతాన్ని ఆంధ్రప్రదేశ్ కి రెండో రాజధానిగా ప్రకటిస్తే తప్ప మన పరువు నిలబడేలా లేదు.

వీరుభొట్ల వెంకట గణేష్ said...

మీతో ఏకీభవిస్తున్నాను. కాని, మిగతా వ్యాఖ్యాతలు చెప్పినట్టు, దాదాపు దేశంలోని అన్ని నగరాలలోను ఇదే పరిస్థితి. మీరు వర్షాకాలంలో మద్రాసు వస్తే తెలుస్తుంది. మీరు చెప్పిన మౌలిక సదుపాయలేవి మద్రాసులో కూడా లేవు. మీరు చెప్పినట్టు ఐనాక్సులు వస్తే అబివృద్ది అయినట్టు కాదు. మా ఇల్లు ఐనాక్సు ఎదురుకుండానే. ఐనాక్సు వచ్చినంత మాత్రాన ఊర్వశి సెంటర్లో పెద్ద మార్పు ఏమి రాలేదు. BRTS రోడ్ అనేది ఒక విఫల యత్నం. అక్కడ ఒక పాదచారుడు రోడ్డు దాటాలంటే నరకమే. ఏది ఎలా ఉన్నా బెజవాడ అంటే నాకు ఎంతో ఇష్టం.

rentala jayadeva said...

నమస్తే. కామెంట్లు చేసిన వారందరికీ కృతజ్ఞతలు. నా అభిప్రాయం పోస్టుల్లో వివరంగానే చెప్పాననుకుంటున్నాను.

@ జ్యోతి గారూ, మనకు మనం చేతలకు సంసిద్ధం కావడానికే ఈ మాటలు. అందుకు ఈ పోస్టులు ఏ కొంచెమైనా ఉపకరిస్తాయేమోనని ఆశ.

@ వీరుభొట్ల వెంకట గణేష్ గారూ, విజయవాడ గురించి ఐనాక్స్ పరిసరాలు, బి.ఆర్.టి.ఎస్. రోడ్ల గురించి మీ పరిశీలన విలువైనది. మీరన్నట్లు మద్రాసులోనూ ఇలాంటి ఇబ్బందులున్నాయి. కానీ, ఇక్కడి ప్రజలకు మనకంటే చైతన్యం ఎక్కువే. వాళ్ళకూ, ప్రతిపక్షాలకూ భయపడి, ఇక్కడి స్థానిక, రాష్ట్ర ప్రభుత్వాలు (ఏ పార్టీలు అధికారంలో ఉన్నా) సమస్యలకు వీలైనంత వెంటనే స్పందిస్తుంటాయి. కళలు, సంస్కృతి, సాహిత్యం విషయంలో వీళ్ళకు మన కన్నా పట్టుదల ఎక్కువే. మనకు కూడా ఆ చైతన్యం వస్తే బాగుంటుందన్నదే నా పోస్టు వెనకనున్న బాధ.

Anonymous said...

మన బెజవాడ తాలూకు గొప్పతనమేమిటంటే ఇక్కడున్నన్ని రాజకీయాలు యు పి, బీహార్ లలో కూడా ఉండవు.
ఇంక అభివృధ్ధికి టైమెక్కడ ఉంటుంది మన నాయకులకి?

వీలైతే నా బ్లాగులో "బెజవాడ జంక్షన్" టపా చదవండి.

Anonymous said...

జ్యోతి గారు,
మీకు ఎన్నికల మీద ఇంకా ఆశ ఉందని అని పిస్తోంది. పని చేయకుంటే అడగాలి ప్రశ్నించాలి అని మీరంట్టున్నారు కాని ఎదైనా ఆఫీసుకి వేళ్ళినప్పుడు మీరొక్కరే ఉంటారు అక్కడ వారిని అడిగితే మీరు ఒక్కరు వారు నలుగురు ఉండి మీనొరెత్తనియ్యరు. పోని నలుగురిని వేంట పెట్టుకు పోయి అడిగితె దాడి చేయటానికి వచ్చారని అని ఎదుటి పక్షం వారంటారు. రాజకీయ నయకులను అడిగితె ఇది ప్రతిపక్షాల కుట్ర అని అంటారు. మొత్తానికి ఎవరు ఎవరిని అడిగ్ ప్రశ్నించే పరిస్థితి లేదు. ఒకరుగా పోతె మాట వినరు గుంపు గా పోతె లాటిచార్జ్ చేసెంతవరకు వెళతారు. అమ్మఓడి ఆమే రాసినట్లు మన మంతా సామాన్య ప్రజలు నం:5 వర్గం కింద వస్తాము, ఈ వర్గ ప్రజలు సంస్కృతి,సాంప్రదాయం నిలబేట్టు కుంట్టూ సంఘానికి హాని కలుగూ కుండా, ఉన్నతలో తృప్తి గా జీవిస్తూ చట్టన్ని వ్యతిరేకించకుండా ఒక ఆదర్శకుటుంబ జీవనం గడపాలనుకునే వాళ్లం. మరి ఇప్పుడు ఆ వలి వైపు ఉన్నవారికి నిరంతరం డబ్బు,అధికారం, హోదా పిచ్చి ఎవరు ఎటు పోయినా పరవాలేదు వారికి దక్క వలసినది దక్కాలి అనుకునే స్వభావం మునుపేన్నడు లేని విధంగా వారు తారాస్థాయిలో ఈ కోరికలని బాహాటం గా వెలిబుచ్చు తున్నారు.ఇక మనం చేయదగ్గది మీకు నచ్చినా నచ్చక పోయినా బ్లాగులు రాసుకోవటం ఒక్కటె అంతకు మించి చేయాలంటె ఉన్న ఉద్యోగాలు వదులుకొని రంగం లోకి దిగాలి. ఆతరువాత మనకు వచ్చె ఇమేజి అమ్మఓడి ఆమే లా మనల్ని చాలా మంచి పిచ్చి వారు అని , నీకు సంఘంలో అన్ని చేడు గా/ నెగటివ్ గా కనిపిస్తున్నయి అని తిట్టటం మొదలు పేడతారు.

జ్యోతి said...

మంచిమాట చెప్పారు. మీ పేరు మాత్రం చెప్పలేదు.
అందుకే నేను మొన్నసారి ఎన్నికలప్పుడు ఓటు వేయలేదు. అలా చేసినందుకు నా మీద విరుచుకుపడ్డారు చాలా మంది. ఓటు వేయకుండా ప్రభుత్వాన్ని ఏది కావాలని అడగకూడదు అన్నారు.సరే అని నేను ఓటు వేయలేదు కాబట్టి అడగను అని నిర్ణయించుకున్నాను. ఇపుడు జరిగే సంఘటనలలో ఓటు వేసినవారు ఎవరైనా నోరెత్తి మాట్లాడుతున్నారా. లేదే.. కాని నాకు సాధ్యమైనంతవరకు లంచం లాంటివి ఇవ్వకుండా పని చేసుకుంటాను ఆలస్యమైనా.. అది కాదు అనుకుంటే ఆ పని వదిలేయడమే.

swathimadhav said...

Rajuni choosina kallaki, mogudni chusthe, motthukovalanipinchidhita.
alavundi miru cheppedi
miru ekkado metro nagralo vundi vachi alaga suddenga mamlni maripovalnate elanandi babu?

rentala jayadeva said...

స్వాతీమాధవి గారూ, నమస్తే. ముందుగా మీ వ్యాఖ్యకు కృతజ్ఞతలు. నేను ఎక్కడో మెట్రో నగరాలలో ఉండి, సడెన్ గా రావడం కాదు. నేను పుట్టింది, పెరిగింది, చదివింది, ఎదిగింది - బెజవాడలోనే. ఉద్యోగ రీత్యా వేరే చోటికి వెళ్ళినా, బెజవాడ తరచుగానే వస్తుంటా. నా చిన్నప్పటి బెజవాడనూ, ఇప్పటి విజయవాడనూ చూసినప్పుడు జరగాల్సినంత అభివృద్ధి జరగలేదనే నా వాదన, వేదన. ఇక్కడ మళ్ళీ మీరు అభివృద్ధి అంటే మెట్రో నగరాలతో పోలిక అనుకోకండి. కనీస వసతులు కోరుకోవడానికి మెట్రో నగరం కానక్కరలేదే!

నిన్న గాక మొన్న వినాయక చవితికి ముందు భారీ వర్షాల్లో బుడమేరు మళ్ళీ పొంగడం నిజం కాదా. పేటలు మునగడం, కింది భాగాల వాళ్ళు ఇళ్ళు ఖాళీ చేయడం నిజం కాదా. కొన్నేళ్ళుగా ఉన్న బుడమేరు సమస్యను ఇన్ని ప్రభుత్వాలు మారినా, పరిష్కరించ లేదేం. ఆ ఇబ్బంది తీరాలంటే, ఇంకా ఎన్ని ప్రపంచ బ్యాంకు నిధులు కావాలంటారు, రావాలంటారు.

పల్లెటూళ్ళ మాట సరే సరి. కానీ, నగరమని మనం బోర విరుచుకుంటున్న మన ఊళ్ళో బస్సులు కూడా రాని, రాలేని పేటల గురించి మనకు పట్టదా. మన పాలకులకు వాటిని బాగు చేయాలన్నది తట్టదా. వర్షానికి మునిగే పేటలు, వాడలు మద్రాసు, ముంబయ్ లలో కూడా ఉన్నాయా. మరి అవి మెట్రో నగరాలే కదా. అంటే ఇక్కడ సమస్య నగరమా, మహా నగరమా అన్నది కాదు. ఆ యా ప్రాంతాల సమస్యల పరిష్కారానికి పాలకులు పట్టించుకోకపోవడం. సమగ్ర అభివృద్ధి కోసం జనం, అంటే మీరు, నేను, మనం ఉద్యమించకపోవడం. ఉన్న సమస్యలకు కొత్తవి తోడవుతున్నా సరే - ‘నా జన్మభూమి ఎంత అందమైన దేశమూ, నా ఇల్లు అందులోన కమ్మని ప్రదేశమూ...’ అని కళ్ళు మూసుకొని పాడుకుంటూ పోవడం. కనీసం కళ్ళు తెరిచి చూడాలనో, చూసి మాట్లాడాలనో అనుకోకపోవడం.

‘రాజును చూసిన కళ్ళతో మొగుణ్ణి చూస్తే మొత్త (పచ్చిగా చెప్పాలంటే - కొట్ట) బుద్ధేసిందట’ అన్నది మీరు చెప్పదలుచుకున్న సామెత. కానీ, నేనిక్కడ ఉన్న ఊళ్ళో రాజును చూడడం లేదు. ఎక్కడైనా రాజు కనిపించినా, నా మటుకు నాకు ‘నా మొగుడే’ (అదే మన ఊరు బెజవాడ) నాకిష్టం. మొగుడు కూడా రాజు లాగా ఉండాలని సతాయిస్తే తప్పేమో కానీ, ఉండాలని ఆశిస్తే తప్పు లేదేమోగా.

ఇంకా మన ఊరు మామూలు వసతుల్లో మహరాజులా మారడానికి మరెన్ని ఎన్నికలు రావాలంటారు. ఇంకెన్ని ప్రభుత్వాలు మారాలంటారు. నిజాయతీగా చెప్పండి. ఎన్నికలు వస్తుంటే ఆ కొద్ది రోజులు మాత్రం మన దగ్గరకొచ్చి వోట్ల కోసం దేబిరించే పాలక రాజాలను ఏం చేయాలంటారు. మీరే చెప్పండి. మీ వ్యాఖ్యతో నన్ను ఈ రోజు ఇంకోసారి బెజవాడలో తిప్పినందుకు మరోమారు కృతజ్ఞతలు. మీ స్పందన కోసం ఎదురుచూస్తుంటా.

snigdha said...

>>>వాడలు మద్రాసు, ముంబయ్ లలో కూడా ఉన్నాయా. మరి అవి మెట్రో నగరాలే కదా

ground terrain low lying areas లో ఉన్నప్పుడు రాజకీయ నాయకులు మాత్రం ఏం చేస్తారు

వాడలు లేకుండా సిటీ ఎలా అవుతుంది
పేదవాడికి సిటీ లో నివసించే హక్కు లేదా
వాడు తర తరాలుగా అక్కడే ఉన్నాడు అక్కడే ఉంటాడు

rentala jayadeva said...

స్నిగ్ధ గారూ, నమస్కారం. అమ్మో, అమ్మో.... నావి కాని భావాలను నావిగా అనకండి.

"....వర్షానికి మునిగే పేటలు, వాడలు మద్రాసు, ముంబయ్ లలో కూడా ఉన్నాయా. మరి అవి మెట్రో నగరాలే కదా. అంటే ఇక్కడ సమస్య నగరమా, మహా నగరమా అన్నది కాదు. ఆ యా ప్రాంతాల సమస్యల పరిష్కారానికి పాలకులు పట్టించుకోకపోవడం..."
అన్న నా వ్యాఖ్యలో "...వర్షానికి మునిగే పేటలు, వాడలు మద్రాసు, ముంబయ్ లలో కూడా ఉన్నాయి...." అని పడాల్సింది, అప్పు తచ్చుగా "... ఉన్నాయా..." అని వచ్చింది. అది నా టైపింగ్ లాఘవం!...ప్చ్.... ఏం చేయను....

అయినా, మిగతా వాక్యాలు చదివితే నా బాధ అర్థమవుతుంది. నా గోడు కూడా మధ్య, దిగువ మధ్య తరగతి నివసిస్తున్న ప్రాంతాల్లో వసతులు పెంచమనే. అలాంటి వాళ్ళ సంగతి పట్టకుండా ఐనాక్స్ లే అభివృద్ధి అనుకోవద్దని. మీరు నా పోస్టులు '...కళ్ళుండీ చూడలేని వారి కోసం మా బెజవాడ ఘనత -1' (http://ishtapadi.blogspot.com/2010/08/1.html), అలాగే, '...బెజవాడలో అభివృద్ధి అంటే ఇదేనా...' (http://ishtapadi.blogspot.com/2010/08/blog-post_09.html) అనే రెండు పోస్టులు కూడా చూడండి. అప్పుడు అసలు చర్చ మీద మీ కామెంటేమిటో చెప్పండి. అప్పటి దాకా ఈ అచ్చు తప్పుల కొసరు భాగవతానికి మన్నించండి.

బాబోయ్... పోస్టు వేశాక, అందులో అచ్చు తప్పులు దిద్దడానికి వీలున్నట్లే, కామెంట్లో అచ్చు తప్పులు దిద్దే వీలుందా. ఎవరైనా చెప్పి పుణ్యం కట్టుకోండి... లేదంటే, బాబోయ్...... బాబోయ్....